22-ఏ రద్దు చేయాలి.. ప్రజల భూములపై ఈ ‘నిషేధం’ ఎందుకు? గుజ్జ సత్యం

• సామాన్యుడి ఆస్తికి సంకెళ్లు.. దళారులకు దారులు! 22-ఏ పేరుతో వేధింపులు

హైదరాబాద్, ఆగస్టు 18: 22-ఏ నిబంధనను భూముల రక్షణకు ఉపయోగించాల్సిన ప్రభుత్వం.. అదే నిబంధనను సామాన్యుల ఆస్తులపై కత్తిగా మార్చిందని జాతీయ బీసీ సంక్షేమ సంఘం జాతీయ ఉపాధ్యక్షుడు గుజ్జ సత్యం తీవ్రంగా మండిపడ్డారు. ప్రభుత్వ భూములు, చెరువులు, వక్ఫ్‌, దేవాదాయ, అటవీ, ఇతర రక్షిత భూములను కాపాడటం ప్రభుత్వ బాధ్యతే అయినప్పటికీ, దశాబ్దాల క్రితం చట్టబద్ధంగా కొనుగోలు చేసి రిజిస్ట్రేషన్ చేసుకున్న సాధారణ ప్రజల ప్లాట్లు, ఇళ్లు, పట్టా భూములు 22-ఏ నిషేధిత జాబితాలోకి వెళ్లేలా వ్యవస్థ పనిచేస్తుండటం దారుణమన్నారు. భూమిని కాపాడాల్సిన 22-ఏ.. ప్రజలనే భూమికి దూరం చేసే ‘పరిపాలనా ఆయుధంగా’ మారిందని, దీనిని ప్రభుత్వం తక్షణమే రద్దు చేసి ప్రజలకు అనుకూలమైన పారదర్శక వ్యవస్థను తీసుకురావాలని ఆయన డిమాండ్ చేశారు.

ఒక సామాన్యుడి భూమి 22-ఏలో పడిన దగ్గర నుంచి మొదలయ్యేది అసలు కష్టాల పరంపర అని గుజ్జ సత్యం పేర్కొన్నారు. మొదటి దశలో ఎలాంటి స్పష్టమైన సమాచారం లేకుండానే భూమి నిషేధిత జాబితాలో కనిపించడంతో యజమాని ఒక్కసారిగా భయాందోళనకు గురవుతున్నాడని, పిల్లల చదువులు, పెళ్లిళ్లు, వైద్యం, వ్యాపారం వంటి అత్యవసర అవసరాల కోసం తన జీవితకాల సంపాదనైన 100 గజాల ప్లాట్‌ను అమ్ముకోవడానికి వెళ్లిన వ్యక్తికి రిజిస్ట్రేషన్ నిలిచిపోవడం తీవ్ర ఆర్థిక సంక్షోభాన్ని తెచ్చిపెడుతోందన్నారు. రెండో దశలో సమస్య పరిష్కారం కోసం తహసీల్దార్‌ కార్యాలయం, కలెక్టరేట్‌, సబ్‌-రిజిస్ట్రార్‌ కార్యాలయం అంటూ బాధితుడిని ‘స్తంభం నుంచి స్తంభానికి’ తిప్పుతున్నారని, ఒకచోట ‘మా పరిధిలో లేదు’ అంటుంటే మరోచోట ‘గ్రౌండ్‌ రిపోర్టు రాలేదు’ అని, ఇంకోచోట ‘పోర్టల్‌లో లాక్‌ ఉంది’ అంటూ ఫైళ్లను ముందుకు కదలనివ్వడం లేదని ఆరోపించారు. గ్రీవెన్స్‌, ఫైల్‌ ప్రాసెస్‌, పరిశీలన పేరుతో రోజులు, వారాలు, నెలలు గడుస్తున్నా బాధితుడికి స్పష్టమైన పరిష్కారం దొరకకపోవడం పరిపాలనా వైఫల్యానికి నిదర్శనమన్నారు. అధికారికంగా నిర్ణయించాల్సిన పని అనధికారిక ఒత్తిళ్లకు, మధ్యవర్తిత్వానికి అవకాశం కల్పించే స్థాయికి చేరితే అది ప్రజాస్వామ్య పాలనకు మచ్చ అని వ్యాఖ్యానించారు. మూడో దశలో అధికార యంత్రాంగం చుట్టూ తిరిగి విసిగిపోయిన బాధితుడి బలహీనతను రియల్‌ ఎస్టేట్‌ దళారులు సొమ్ము చేసుకునే ప్రమాదం ఉందన్నారు. ‘నీ భూమి 22-ఏలో ఉంది.. రిజిస్ట్రేషన్‌ కాదు.. మేం చూసుకుంటాం.. మార్కెట్‌ ధరలో కొంత భాగానికే మాకు ఇచ్చేయ్‌’ అంటూ బాధితులను ఒత్తిడికి గురిచేసే పరిస్థితి ఏర్పడితే అది చట్టం పేరుతో సామాన్యుడి ఆస్తిని కారుచౌకగా లాక్కునే దుర్మార్గపు వ్యవస్థగా మారుతుందని హెచ్చరించారు. నాలుగో దశలో మాత్రం మరింత తీవ్రమైన ప్రమాదం ఉందని గుజ్జ సత్యం అన్నారు. ప్రజల ఒత్తిడి పెరిగినప్పుడు 22-ఏ సమస్యల పరిష్కారం పేరుతో భూముల నిషేధిత జాబితాను భారీగా సడలిస్తే, నిజంగా రక్షించాల్సిన ప్రభుత్వ భూములు, చెరువులు, కుంటలు, వక్ఫ్‌, దేవాదాయ, అటవీ భూములు, ఇతర ప్రజా ఆస్తులు కూడా అనర్హంగా క్లియర్‌ అయ్యే ప్రమాదం ఉందని ఆందోళన వ్యక్తం చేశారు. అంటే ఒకవైపు సామాన్యుడి భూమిని 22-ఏ పేరుతో బంధించి, మరోవైపు అదే 22-ఏ క్లియరెన్స్‌ పేరుతో ప్రజా ఆస్తులకు ప్రమాదం తెచ్చే పరిస్థితి ఏర్పడకూడదని స్పష్టం చేశారు.

చట్టం తప్పు కాదు.. అమలు విధానమే అసలు సమస్య

22-ఏ నిబంధన ఉద్దేశం ప్రభుత్వ, ప్రజా ప్రయోజన భూములను అక్రమ బదలాయింపుల నుంచి కాపాడటమే అయితే, దానిని అమలు చేసే విధానంలోనే అసలు లోపాలు ఉన్నాయని గుజ్జ సత్యం అన్నారు. ఒక సర్వే నంబర్‌ను నిషేధిత జాబితాలో చేర్చే ముందు యజమానికి సమాచారం ఇచ్చారా? పాత రిజిస్ట్రేషన్‌ పత్రాలు పరిశీలించారా? రెవెన్యూ రికార్డులు, పట్టాదారు పాస్‌బుక్‌లు, పహాణీలు, నిర్మాణాలు, పన్నుల చెల్లింపులు, కోర్టు ఉత్తర్వులు వంటి అంశాలను సమగ్రంగా పరిశీలించారా? అనే ప్రశ్నలకు ప్రభుత్వం సమాధానం చెప్పాలని డిమాండ్ చేశారు.

తప్పుగా 22-ఏలో చేర్చిన భూమిని తొలగించడానికి ప్రజలు మళ్లీ అదే అధికారుల చుట్టూ తిరగాల్సిన పరిస్థితి ఉండకూడదన్నారు. ‘చేర్చడం సులభం.. తొలగించడం ఎందుకు కష్టం?’ అని ప్రశ్నించిన ఆయన, ఒక భూమిని నిషేధిత జాబితాలో చేర్చిన అధికారి, దానికి ఆధారమైన పత్రం, నిషేధానికి వర్తించే చట్టం, తొలగింపునకు తీసుకున్న నిర్ణయం వంటి వివరాలన్నీ డిజిటల్‌ రికార్డులో ప్రజలకు కనిపించేలా చేయాలని కోరారు.

22-ఏను ‘అవినీతి అడ్డాగా’ మారనివ్వొద్దు

పత్రాలు సక్రమంగా ఉన్నప్పటికీ ఒక కార్యాలయం నుంచి మరో కార్యాలయానికి తిప్పడం, స్పష్టమైన గడువు లేకపోవడం, ఫైళ్ల స్థితి తెలియకపోవడం వంటి అంశాలు ప్రజల్లో అనుమానాలకు తావిస్తున్నాయని గుజ్జ సత్యం అన్నారు. ‘ఫైల్‌ ఎక్కడుంది? ఎవరి దగ్గరుంది? ఎప్పుడు పరిష్కరిస్తారు?’ అనే ప్రశ్నకు ఆన్‌లైన్‌లోనే సమాధానం కనిపించే విధానం రావాలని డిమాండ్ చేశారు. బాధితులు అధికారులను సంప్రదించేందుకు ప్రభుత్వం ప్రకటించిన ఫిర్యాదు వ్యవస్థలు కూడా సమర్థంగా పనిచేయాలని, టోల్‌ఫ్రీ సేవలు అందుబాటులో లేకపోతే వాటిని వెంటనే పునరుద్ధరించాలని కోరారు.

భూ భారతి రికార్డులపై ప్రజలకు పూర్తి హక్కు

భూ భారతి వంటి డిజిటల్‌ భూ రికార్డు వ్యవస్థలో ప్రతి సర్వే నంబర్‌కు సంబంధించిన సమాచారం మరింత పారదర్శకంగా అందుబాటులో ఉండాలని గుజ్జ సత్యం అన్నారు. ఎప్పుడు నిషేధిత జాబితాలో చేర్చారు? ఏ కారణంతో చేర్చారు? ఎవరి నివేదిక ఆధారంగా చేర్చారు? యజమాని ఎప్పుడు అభ్యంతరం వ్యక్తం చేశాడు? ఎవరు పరిశీలించారు? ఎప్పుడు తొలగించారు? అనే ప్రతి అంశానికి డిజిటల్‌ ట్రైల్‌ ఉండాలని సూచించారు. రికార్డుల్లో తప్పు ఉంటే దాని బాధ్యత ఎవరిదో కూడా నిర్ధారించాల్సిందేనన్నారు.

ప్రజల భూమి.. అధికారుల ప్రయోగశాల కాదు

“ఒక కుటుంబం దశాబ్దాలుగా కష్టపడి సంపాదించిన భూమి కేవలం ఒక రికార్డు ఎంట్రీతో అమ్ముకోలేని ఆస్తిగా మారితే ఆ కుటుంబం పరిస్థితి ఏమిటి? భూమి విలువ పెరిగినా యజమాని దానిని వినియోగించుకోలేకపోతే ఆస్తి హక్కుకు అర్థమేంటి?” అని గుజ్జ సత్యం ప్రశ్నించారు. భూ వివాదాలు, రికార్డు తప్పులు, నిషేధిత జాబితా సమస్యలను పరిష్కరించాల్సిన బాధ్యత ప్రభుత్వానిదేనని, దాని భారాన్ని మాత్రం సామాన్య ప్రజలపై మోపడం తగదన్నారు.

తక్షణమే 22-ఏ రద్దు.. కొత్త విధానం తీసుకురావాలి

ప్రస్తుత 22-ఏ అమలు విధానాన్ని తక్షణమే నిలిపివేసి సమగ్ర సమీక్ష నిర్వహించాలని, ప్రజలకు ఇబ్బంది కలిగించే నిబంధనలను రద్దు చేసి ‘ప్రజా ఆస్తి రక్షణ–వ్యక్తిగత ఆస్తి హక్కు’ రెండింటినీ సమతుల్యం చేసే కొత్త పారదర్శక విధానాన్ని రూపొందించాలని గుజ్జ సత్యం డిమాండ్ చేశారు. జిల్లా వారీగా 22-ఏ భూములపై ప్రత్యేక ఆడిట్‌ నిర్వహించి, తప్పుగా చేర్చిన భూములను నిర్దిష్ట గడువులో తొలగించాలని, నిజంగా ప్రభుత్వ లేదా రక్షిత భూములు అయితే వాటిని కఠినంగా కాపాడాలని కోరారు.

“22-ఏ పేరుతో సామాన్యుడిని కార్యాలయాల చుట్టూ తిప్పడం ఆపాలి. ప్రజల జీవితకాల సంపాదనను రికార్డుల తప్పిదాలకు బలి చేయకూడదు. భూములను కాపాడటం ప్రభుత్వ బాధ్యతే.. కానీ ఆ పేరుతో ప్రజల ఆస్తి హక్కులను హరించే అధికారం ఎవరికీ లేదు. ప్రజల భూములకు భద్రత, రికార్డులకు పారదర్శకత, అధికారులకు జవాబుదారీతనం కల్పించలేని 22-ఏ వ్యవస్థను తక్షణమే రద్దు చేయాలి” అని గుజ్జ సత్యం రాష్ట్ర ప్రభుత్వాన్ని డిమాండ్ చేశారు.