“2027 జనగణనలో ప్రశ్న నెం.10కు ప్రత్యేక OBC కాలమ్ ఉండాల్సిందే”

• లెక్కల్లో బీసీలు స్పష్టంగా కనిపించినప్పుడే.. న్యాయమైన వాటా దక్కుతుంది
• 2027 జనగణన కేవలం జనాభా లెక్క కాదు.. దేశ సామాజిక నిర్మాణానికి ‘ఎక్స్‌రే’ కావాలి

భారతదేశంలో సామాజిక న్యాయం గురించి మాట్లాడుతున్న ప్రతిసారీ ఒక ప్రశ్న ముందుకు వస్తుంది. ఈ దేశంలో బీసీలు, ఓబీసీలు ఎంతమంది? ఈ ప్రశ్నకు ఇప్పటికీ ఖచ్చితమైన, సమగ్ర సమాధానం మన దగ్గర లేదు. మరి జనాభాలో ఎంతమంది ఉన్నారో తెలియకుండా వారి సామాజిక పరిస్థితి ఎలా అంచనా వేస్తాం? విద్యలో వారి వాటా ఎంత? ప్రభుత్వ ఉద్యోగాల్లో వారి ప్రాతినిధ్యం ఎంత? రాజకీయాల్లో వారి భాగస్వామ్యం ఎంత? ప్రభుత్వ సంక్షేమ పథకాలు వారికి ఎంతవరకు చేరుతున్నాయి?—ఇవన్నీ ఎలా నిర్ణయిస్తాం?

అందుకే 2027 జనగణనలో కులగణన చేపట్టాలని కేంద్ర ప్రభుత్వం తీసుకున్న నిర్ణయం చారిత్రకమైనది. దీన్ని మేము స్వాగతిస్తున్నాం. కానీ కులగణన చేయడం ఒక్కటే సరిపోదు. కులగణన ఎలా చేయబోతున్నారన్నదే అసలు విషయం.

కేంద్ర ప్రభుత్వం ఆగస్టు 14, 2026న జనగణన రెండో దశకు సంబంధించిన ప్రశ్నావళిని నోటిఫై చేసింది. అందులో 10వ ప్రశ్నగా “Scheduled Caste (SC)/Scheduled Tribe (ST)/Caste” అంశాన్ని చేర్చింది. ఎస్సీ, ఎస్టీలను మినహాయించి ఇతరుల కుల వివరాలను ఓపెన్‌-ఎండెడ్‌ ఫీల్డ్‌లో వారు చెప్పిన విధంగా నమోదు చేసే విధానం ప్రతిపాదించబడింది.

ఇక్కడే మా ప్రధాన అభ్యంతరం, మా ప్రధాన విజ్ఞప్తి మొదలవుతోంది.

కులం పేరు అడగడం వేరు.. కులాన్ని శాస్త్రీయంగా లెక్కించడం వేరు

ఒక వ్యక్తిని “మీ కులం ఏమిటి?” అని అడిగితే ఆయన ఒక పేరు చెబుతారు. ఆ పేరును ఎన్యూమరేటర్ నమోదు చేస్తారు. ఇది సులభంగా కనిపించే ప్రక్రియ. కానీ దేశవ్యాప్తంగా కోట్లాది కుటుంబాల నుంచి ఇలాంటి వివరాలు సేకరించిన తర్వాత ఆ డేటాను ఎలా వర్గీకరిస్తాం?

ఒకే కులానికి ఒక రాష్ట్రంలో ఒక పేరు, మరో ప్రాంతంలో మరో పేరు ఉండవచ్చు. పర్యాయపదాలు ఉండవచ్చు. మాండలిక భేదాలు ఉండవచ్చు. ఉపకులాల పేర్లు ఉండవచ్చు. స్థానికంగా వాడే పేర్లు ఉండవచ్చు. కొన్నిసార్లు ఇంటిపేరును కూడా కులపేరుగా నమోదు చేసే పరిస్థితి రావచ్చు.

అప్పుడు ఒకే సామాజిక వర్గానికి చెందిన ప్రజలు వేర్వేరు పేర్లతో నమోదైతే వారి సంఖ్య విడిపోయే ప్రమాదం ఉంది. సంఖ్య విడిపోతే ప్రాతినిధ్యం తగ్గుతుంది. ప్రాతినిధ్యం తగ్గితే విధాన నిర్ణయాల్లో వారి స్థానం కూడా బలహీనపడుతుంది.

అందుకే మేము అడుగుతున్నది కేవలం ఒక కాలమ్‌ కాదు. ఓబీసీ వర్గానికి స్పష్టమైన గుర్తింపు, ప్రతి కులానికి ప్రామాణిక కోడ్‌, రాష్ట్రాల వారీగా అధికారిక కులాల జాబితా, పర్యాయపదాలు–ఉపకులాల శాస్త్రీయ మ్యాపింగ్‌, డిజిటల్‌ డ్రాప్‌డౌన్‌ కోడింగ్‌ విధానం కావాలని కోరుతున్నాం.

ఓబీసీ కాలమ్‌ ఎందుకు అవసరం?

“కులం పేరు నమోదు చేస్తే సరిపోతుంది కదా.. ఓబీసీ అని ప్రత్యేకంగా ఎందుకు అడగాలి?” అని కొందరు ప్రశ్నించవచ్చు.

దీనికి సమాధానం చాలా స్పష్టం.కులం ఒక గుర్తింపు. ఓబీసీ ఒక సామాజిక-పరిపాలనా వర్గీకరణ.
ఒక వ్యక్తి తన కులాన్ని చెప్పడం ఒక సమాచారం. ఆ కులం ఓబీసీ జాబితాలో ఉందా? రాష్ట్రంలో ఏ వర్గీకరణలో ఉంది? దాని జనాభా ఎంత? ఆ కులానికి చెందిన ప్రజల విద్యా స్థాయి ఎంత? ఉద్యోగాల్లో వారి వాటా ఎంత? రాజకీయ ప్రాతినిధ్యం ఎంత?—ఇవి మరో స్థాయి సమాచారం.

అందుకే కులగణనలో ఓబీసీకి స్పష్టమైన కాలమ్‌ లేదా కేటగిరీ ఉండాలని మేము కోరుతున్నాం.

ఇది ఎవరికీ వ్యతిరేకమైన డిమాండ్‌ కాదు. ఇది డేటా స్పష్టత కోసం చేస్తున్న డిమాండ్‌.
లెక్కల్లో ఓబీసీలు స్పష్టంగా కనిపించాలి. బీసీల్లోని ప్రతి కులం కనిపించాలి. ప్రతి కులానికి సంబంధించిన వాస్తవ జనాభా బయటకు రావాలి. అప్పుడే ఆ కులం సామాజికంగా ఎక్కడ ఉందో, విద్యాపరంగా ఎక్కడ ఉందో, ఉద్యోగాల్లో ఎంత వెనుకబడి ఉందో, రాజకీయంగా ఎంత ప్రాతినిధ్యం పొందిందో అర్థం చేసుకునే అవకాశం ఉంటుంది.

జనాభా తెలియకపోతే న్యాయం ఎలా చేస్తాం?

ఒక గ్రామంలో 100 కుటుంబాలు ఉన్నాయని అనుకుందాం. అందులో 50 కుటుంబాలు ఒక సామాజిక వర్గానికి చెందినవని మనకు తెలుసు. కానీ ఆ 50 కుటుంబాల్లో ఏ కులానికి చెందిన వారు ఎంతమంది? వారి విద్యా పరిస్థితి ఏమిటి? ఎన్ని కుటుంబాలకు భూమి ఉంది? ఎన్ని కుటుంబాల్లో ప్రభుత్వ ఉద్యోగులు ఉన్నారు? రాజకీయ ప్రాతినిధ్యం ఎలా ఉంది? తెలియకపోతే ఆ గ్రామానికి ఏ విధమైన అభివృద్ధి కార్యక్రమం అవసరమో ఎలా నిర్ణయిస్తాం?

ఇదే సమస్య రాష్ట్రానికి, దేశానికి వర్తిస్తుంది.జనాభా లెక్కలు కేవలం సంఖ్యలు కావు. అవే విధానాలకు పునాది.
విద్యా విధానాలు రూపొందించాలంటే డేటా కావాలి. ఉద్యోగ అవకాశాలపై విధానాలు రూపొందించాలంటే డేటా కావాలి. రిజర్వేషన్లపై నిర్ణయాలు తీసుకోవాలంటే డేటా కావాలి. సంక్షేమ పథకాలను లక్ష్యితంగా అమలు చేయాలంటే డేటా కావాలి. రాజకీయ ప్రాతినిధ్యంపై చర్చించాలంటే కూడా డేటా కావాలి.

అందుకే “ఎంతమంది ఉన్నారు?” అనే ప్రశ్నకు ఖచ్చితమైన సమాధానం రావడం మొదటి మెట్టు మాత్రమే. “ఎలాంటి పరిస్థితుల్లో ఉన్నారు?” అన్నది తదుపరి మెట్టు.

తెలంగాణ అనుభవం ఏం చెబుతోంది?

కులగణన అవసరాన్ని అర్థం చేసుకోవడానికి తెలంగాణలో జరిగిన SEEEPC సర్వే ఒక ముఖ్యమైన ఉదాహరణ. తెలంగాణ ప్రభుత్వం 2024లో కుటుంబ స్థాయిలో సామాజిక, ఆర్థిక, విద్య, ఉపాధి, రాజకీయ, కుల వివరాలను సేకరించే SEEEPC సర్వే నిర్వహించింది. ఈ సర్వే ఉద్దేశం రాష్ట్రంలోని ప్రతి కుటుంబానికి సంబంధించిన సమగ్ర, విశ్వసనీయమైన డేటాబేస్‌ రూపొందించి విధాన నిర్ణయాలకు ఉపయోగపడే ఆధారాన్ని కల్పించడం.
తర్వాతి విశ్లేషణలో రాష్ట్రంలోని 242 కులాలను వివిధ సామాజిక-ఆర్థిక సూచికల ఆధారంగా పరిశీలించారు. 42 సూచికలతో రూపొందించిన Composite Backwardness Index ద్వారా కులాల మధ్య సాపేక్ష వెనుకబాటుతనాన్ని అంచనా వేశారు. 242 కులాల్లో 135 కులాలు రాష్ట్ర సగటు కంటే ఎక్కువ వెనుకబాటుతనాన్ని ఎదుర్కొంటున్నట్లు విశ్లేషణ వెల్లడించింది.

ఇక్కడ మనం గమనించాల్సిన అంశం ఒక్కటే , బీసీ అనే ఒక పెద్ద కేటగిరీ లోపల కూడా సామాజిక, ఆర్థిక, విద్యా పరమైన అసమానతలు ఉన్నాయి.

అందుకే “బీసీలు ఇంతమంది” అని ఒకే సంఖ్య చెప్పడం సరిపోదు. బీసీల్లోని ప్రతి కులం ఎంత? వారి పరిస్థితి ఏమిటి? అన్నది కూడా తెలుసుకోవాలి.

42 శాతం బీసీ రిజర్వేషన్ల చర్చకు డేటా ఎందుకు కీలకం?

తెలంగాణలో బీసీలకు 42 శాతం రిజర్వేషన్ల అంశం గత కొంతకాలంగా పెద్ద సామాజిక, రాజకీయ చర్చగా ఉంది. రాష్ట్ర ప్రభుత్వం స్థానిక సంస్థలు, విద్య, ఉద్యోగాల్లో బీసీలకు 42 శాతం రిజర్వేషన్లకు సంబంధించిన చర్యలు చేపట్టింది. ఈ అంశంపై కేంద్రం ఆమోదం కోరుతూ రాష్ట్ర ప్రభుత్వం ఢిల్లీలో కూడా పోరాటం చేసింది.
ఈ పరిణామాలు ఒక విషయాన్ని స్పష్టం చేస్తున్నాయి.
బీసీల హక్కులపై ఏ చర్చ జరిగినా.. దానికి బలమైన డేటా అవసరం.

రిజర్వేషన్‌ ఎంత ఉండాలి? ఎవరు వెనుకబడ్డారు? ఎవరికి ఎక్కువ అవసరం ఉంది? ఏ కులాలు అవకాశాల నుంచి దూరంగా ఉన్నాయి?—ఇవన్నీ తెలుసుకోవాలంటే కులాలవారీగా, సామాజిక పరిస్థితులవారీగా విశ్వసనీయమైన సమాచారం ఉండాలి.

అందుకే 2027 జనగణనను ఒక సాధారణ లెక్కల ప్రక్రియగా చూడకూడదు.

డిజిటల్‌ డ్రాప్‌డౌన్‌ ఎందుకు?

మా మరో ప్రధాన డిమాండ్‌ డిజిటల్‌ డ్రాప్‌డౌన్‌ కోడింగ్‌ విధానం. కేంద్ర, రాష్ట్ర ప్రభుత్వాల వద్ద ఇప్పటికే ఉన్న అధికారిక కులాల జాబితాలను సమన్వయం చేసి ఒక National Caste Master List రూపొందించాలి. ప్రతి కులానికి ఒక ప్రత్యేక కోడ్‌ ఇవ్వాలి. రాష్ట్రాల వారీగా పర్యాయపదాలు, ప్రాంతీయ పేర్లు, ఉపకులాలను ఆ కోడ్‌తో అనుసంధానం చేయాలి.

ఎన్యూమరేటర్‌ తనకు తోచినట్లు కులం పేరు టైప్‌ చేయకుండా, ముందుగా రూపొందించిన శాస్త్రీయ వ్యవస్థలో సంబంధిత కులాన్ని ఎంపిక చేసే విధానం ఉండాలి.

ఇది డేటాను కృత్రిమంగా మార్చడం కాదు. ఒకే కులం వేర్వేరు పేర్లతో నమోదై, చివరికి వేర్వేరు కులాలుగా మారకుండా చూడడం. కులగణన ప్రారంభానికి ముందే ఈ కోడింగ్‌ వ్యవస్థను నిపుణులతో పరీక్షించాలి. ఎన్యూమరేటర్లకు శిక్షణ ఇవ్వాలి. సందేహాస్పదమైన ఎంట్రీల పరిష్కారానికి ప్రత్యేక వ్యవస్థ ఏర్పాటు చేయాలి.

మాకు కావాల్సింది ఏమిటి?

జాతీయ బీసీ సంక్షేమ సంఘం తరఫున కేంద్ర ప్రభుత్వానికి మా విజ్ఞప్తులు స్పష్టంగా ఉన్నాయి:

మొదటిది — ప్రశ్న నెం.10ను పునఃపరిశీలించి OBCకి స్పష్టమైన కేటగిరీ ఇవ్వాలి.

రెండోది — దేశవ్యాప్తంగా ఉన్న OBC/BC కులాలకు సంబంధించిన అధికారిక జాబితాలను సమన్వయం చేసి National Caste Master List రూపొందించాలి.

మూడోది — ప్రతి కులానికి ప్రత్యేక, ప్రామాణిక కోడ్‌ ఇవ్వాలి.

నాలుగోది — డిజిటల్‌ డ్రాప్‌డౌన్‌ ఆధారిత కుల నమోదు విధానాన్ని అమలు చేయాలి.

ఐదోది — పర్యాయపదాలు, ప్రాంతీయ పేర్లు, ఉపకులాలపై ముందస్తు శాస్త్రీయ మార్గదర్శకాలు రూపొందించాలి.

ఆరవది — ఎన్యూమరేటర్లకు ప్రత్యేక సాంకేతిక శిక్షణ ఇవ్వాలి.

ఏడోది — డేటా సేకరణ తర్వాత స్వతంత్ర నిపుణులతో ధృవీకరణ, వాలిడేషన్‌ చేయాలి.

ఎనిమిదోది — తుది డేటా సామాజిక న్యాయ విధానాల రూపకల్పనకు ఉపయోగపడే విధంగా పారదర్శకంగా అందుబాటులోకి తేవాలి.

కేంద్ర ప్రభుత్వం కులగణనపై వచ్చిన సూచనలను పరిశీలించే ప్రక్రియలో భాగంగా ప్రశ్నావళిని ఖరారు చేసిందని గతంలో పార్లమెంటుకు తెలిపింది. కాబట్టి ఇప్పుడు కూడా సాంకేతిక, సామాజిక, పరిపాలనా కోణాల్లో వచ్చిన నిర్మాణాత్మక సూచనలను పరిగణనలోకి తీసుకోవడం సాధ్యమే.

ఇది బీసీల కోసం మాత్రమే కాదు.. భారతదేశం కోసం

ఓబీసీకి ప్రత్యేక గుర్తింపు ఇవ్వాలని కోరుతున్నాం కాబట్టి ఇది ఒక వర్గ ప్రయోజనం కోసం చేస్తున్న డిమాండ్‌ అని ఎవరూ భావించకూడదు. ఎవరి జనాభా ఎంత ఉందో తెలుసుకోవడం ఎవరికీ వ్యతిరేకం కాదు.
ఎవరు ఎంత వెనుకబడి ఉన్నారో తెలుసుకోవడం కూడా ఎవరికీ వ్యతిరేకం కాదు.

నిజమైన లెక్కలు బయటకు వస్తే సమాజంలోని ప్రతి వర్గానికీ తన స్థానం తెలుస్తుంది. ప్రభుత్వం కూడా వాస్తవ పరిస్థితులకు అనుగుణంగా విధానాలు రూపొందించగలదు.

సామాజిక న్యాయం అంటే కేవలం నినాదం కాదు. అది లెక్కలతో నిరూపించగల విధానం కావాలి. తెలంగాణ అనుభవం కూడా అదే చెబుతోంది. కులాలవారీగా డేటా సేకరించినప్పుడు సమాజంలో దాగి ఉన్న అసమానతలు స్పష్టంగా కనిపిస్తున్నాయి. ఆ డేటా ఆధారంగా వెనుకబాటుతనాన్ని కొలవడానికి ప్రయత్నం జరుగుతోంది.

ఇప్పుడు దేశానికి అదే దిశలో ఒక శాస్త్రీయ జాతీయ వ్యవస్థ అవసరం. 2027 జనగణన ఒకసారి పూర్తయిన తర్వాత, “కులాల పేర్లు సరిగ్గా నమోదు కాలేదు”, “ఒకే కులానికి అనేక పేర్లు వచ్చాయి”, “డేటాను వర్గీకరించడం కష్టం”, “సంఖ్యలు నమ్మదగినవి కావు” అనే పరిస్థితి రావద్దు.

ఎందుకంటే ఇది మరో సాధారణ సర్వే కాదు. దీని ప్రభావం రాబోయే దశాబ్దాల సామాజిక విధానాలపై ఉండవచ్చు.

అందుకే ఈరోజే జాగ్రత్త పడాలి.
ఓబీసీని లెక్కల్లో స్పష్టంగా చూపించాలి.
ప్రతి ఓబీసీ కులాన్ని గుర్తించాలి.
ప్రతి కులానికి జనాభా లెక్క తేలాలి.
వారి సామాజిక, విద్యా, ఉద్యోగ, రాజకీయ పరిస్థితులను అర్థం చేసుకునే డేటా ఏర్పడాలి.

అప్పుడే రిజర్వేషన్లపై చర్చకు బలమైన పునాది ఏర్పడుతుంది. సంక్షేమ పథకాలు లక్ష్యితంగా మారతాయి. విద్యా అవకాశాలను పునర్వ్యవస్థీకరించవచ్చు. ఉద్యోగాల్లో ప్రాతినిధ్యాన్ని అంచనా వేయవచ్చు. రాజకీయ ప్రాతినిధ్యంపై వాస్తవ చర్చ జరపవచ్చు.

అంటే—

కులగణన కేవలం “ఎంతమంది?” అనే ప్రశ్నకు సమాధానం కాదు.

“ఎవరు ఎక్కడ ఉన్నారు? వారికి ఎంత న్యాయం జరిగింది? ఇంకా ఏం చేయాలి?” అనే ప్రశ్నలకు సమాధానం చెప్పే శాస్త్రీయ సాధనం.

అందుకే కేంద్ర ప్రభుత్వాన్ని మేము కోరుతున్నది ఒకటే—

2027 కులగణనలో ఓబీసీకి ప్రత్యేక స్థానం ఇవ్వండి.
ప్రతి ఓబీసీ కులాన్ని కచ్చితంగా లెక్కించండి.
ప్రతి కులానికి ప్రత్యేక కోడ్‌ ఇవ్వండి.
శాస్త్రీయ డిజిటల్‌ డ్రాప్‌డౌన్‌ విధానం అమలు చేయండి.
విశ్వసనీయమైన కుల డేటాను దేశానికి అందించండి.

ఎందుకంటే లెక్కల్లో కనిపించని వర్గం.. విధానాల్లో కనిపించదు.
వాస్తవ లెక్కలు తెలిసినప్పుడే.. బీసీలకు న్యాయం చేసే అవకాశం ఉంటుంది.

అదే 2027 కులగణనకు నిజమైన సార్థకత.