వాట్సాప్ వెబ్లో అంతరాయం? లాగిన్, చాట్ సింక్ సమస్యలతో యూజర్ల గగ్గోలు
WhatsApp కు చెందిన WhatsApp Web సేవల్లో అంతరాయం ఏర్పడినట్లు పలువురు యూజర్లు సోషల్ మీడియాలో ఫిర్యాదు చేశారు. లాగిన్ కావడంలో ఇబ్బందులు ఎదుర్కొంటున్నామని, చాట్స్ సరిగా సింక్ కావడంలేదని వినియోగదారులు పేర్కొన్నారు. “మాకు మాత్రమే ఈ సమస్యా? లేక ఇతరులకూ ఉందా?” అంటూ అనుమానాలు వ్యక్తం చేశారు.
ఔటేజ్ ట్రాకింగ్ వెబ్సైట్ Downdetector ప్రకారం, నేడు ఉదయం సుమారు 9 గంటల సమయంలో సమస్యలపై ఫిర్యాదులు నమోదయ్యాయి. ఆ తర్వాత కొంతసేపు ఫిర్యాదుల సంఖ్య క్రమంగా పెరిగినట్లు సమాచారం. సోషల్ మీడియా వేదిక X లో కూడా అనేక మంది యూజర్లు ఇదే సమస్యను ప్రస్తావించారు. “గంట నుంచి వెబ్లో లాగిన్ కావడానికి ప్రయత్నిస్తున్నా సాధ్యపడట్లేదు” అంటూ ఓ యూజర్ వ్యాఖ్యానించారు. ముఖ్యంగా భారతీయ వినియోగదారుల నుంచి ఎక్కువ ఫిర్యాదులు వచ్చినట్లు తెలుస్తోంది.
అయితే ఈ అంతరాయం గురించి ఇప్పటివరకు Meta లేదా వాట్సాప్ అధికారికంగా స్పందించలేదు. గత ఏడాది నవంబర్లో కూడా ప్రపంచవ్యాప్తంగా వాట్సాప్ వెబ్ సేవల్లో అంతరాయం ఏర్పడి, బ్రౌజర్లలో చాట్స్ లోడ్ కాకపోవడం, లాగిన్ సమస్యలతో లక్షలాది మంది ఇబ్బందులు ఎదుర్కొన్నారు. ఆ సమయంలో మొబైల్ యాప్ సాధారణంగానే పనిచేసినప్పటికీ వెబ్ వెర్షన్లో మాత్రమే సమస్యలు తలెత్తాయి.
నిపుణుల ప్రకారం, మెటా అంతర్గత సిస్టమ్లలో లేదా క్లౌడ్ ఏపీఐల్లో సాంకేతిక ఆటంకాలు ఏర్పడినప్పుడు ఇలాంటి సమస్యలు రావచ్చు. దీంతో ఫోన్ మరియు వెబ్ సర్వర్ల మధ్య కనెక్టివిటీ లోపాలు చోటుచేసుకుంటాయి.
అదే విధంగా, కొందరి బ్రౌజర్లలో కాష్ సమస్యలు, వీపీఎన్ వినియోగం, లేదా ఇంటర్నెట్ కనెక్షన్ బలహీనంగా ఉండటం వంటి కారణాలు కూడా వెబ్ సర్వీసులకు ఆటంకం కలిగించవచ్చని నిపుణులు సూచిస్తున్నారు.
