బీసీలకు 42 శాతం రిజర్వేషన్లు అమలు చేసే వరకు ఉద్యమం ఆపేది లేదు: గుజ్జ సత్యం
సత్యతెలంగాణ, హైదరాబాద్: నవంబర్ 25
తెలంగాణలో గ్రామ పంచాయతీ ఎన్నికల్లో బీసీలకు రిజర్వేషన్లను దారుణంగా కుదించి, రాజకీయంగా అణచివేసే కుట్రకు పాల్పడ్డారని బీసీ జేఏసీ స్టేట్ కో-ఆర్డినేటర్, జాతీయ బీసీ సంక్షేమ సంఘం జాతీయ ఉపాధ్యక్షులు గుజ్జ సత్యం ఆగ్రహం వ్యక్తం చేశారు. ఈనెల 25న ఎన్నికల షెడ్యూల్ విడుదలైన రోజును “బీసీలకు చీకటి రోజు – నమ్మక ద్రోహ దినం”గా ప్రకటిస్తున్నట్లు ఆయన ప్రకటించారు.
హైదరాబాద్‌లో మంగళవారం బీసీ జేఏసీ ఆధ్వర్యంలో నిర్వహించిన సమావేశంలో బీసీ జేఏసీ చైర్మన్ రాజ్యసభ సభ్యులు ఆర్ కృష్ణయ్య కలిసి గుజ్జ సత్యం మాట్లాడుతూ, రాష్ట్రంలోని 12,760 గ్రామ పంచాయతీల్లో 42 శాతం రిజర్వేషన్ అమలు చేస్తే 5,300 పైగా సర్పంచ్ స్థానాలు బీసీలకు దక్కేవని, కానీ ప్రస్తుతం కేవలం 18 శాతం మాత్రమే అమలు చేస్తూ దాదాపు 2,500 సీట్లకే పరిమితం చేశారని ఆవేదన వ్యక్తం చేశారు. 2019 ఎన్నికలతో పోలిస్తే ఈసారి దాదాపు 600 సర్పంచ్ స్థానాలను బీసీల నుంచి తొలగించినట్లు ఆయన ఆరోపించారు.
“రొటేషన్ పేరుతో, జీవో నం. 46 ద్వారా బీసీలకు రావలసిన వందలాది గ్రామాలను జనరల్ కేటగిరీకి మళ్లించారు. రాష్ట్రంలో 30 మండలాల్లో ఒక్క బీసీ సర్పంచ్ స్థానం కూడా కేటాయించలేదు. మరో 80 మండలాల్లో ఒకటి లేదా రెండు మాత్రమే ఇచ్చారు. ఇది స్పష్టమైన రాజకీయ కుట్ర” అని గుజ్జ సత్యం మండిపడ్డారు.
గతంలో అనేక సందర్భాల్లో 42 శాతం రిజర్వేషన్లు అమలు చేస్తామని హామీ ఇచ్చిన కాంగ్రెస్ ప్రభుత్వం ఆ మాటను విస్మరించి, ఎన్నికల షెడ్యూల్ విడుదల చేసిందని ఆయన తీవ్ర అసంతృప్తి వ్యక్తం చేశారు.
ఆందోళనల షెడ్యూల్ ప్రకటన
- ఈనెల 29 నుండి రహదారుల దిగ్బంధనం
- డిసెంబర్ మొదటి వారంలో ఢిల్లీలో పార్లమెంటు ముట్టడి
- 42 శాతం రిజర్వేషన్లు సాధించే వరకు ఉద్యమం ఆపేది లేదని స్పష్టీకరణ
“కేంద్ర, రాష్ట్ర ప్రభుత్వాల కుట్రలను ఎదిరించి, బీసీల హక్కుల కోసం రాష్ట్రవ్యాప్తంగా పోరాటం కొనసాగుతుంది. ఎన్నికల షెడ్యూల్ విడుదలైనా ఉద్యమాన్ని ఆపేది లేదు” అని గుజ్జ సత్యం పిలుపునిచ్చారు.
