బీసీలను మోసం చేస్తున్న కాంగ్రెస్ 

బీసీ జేఏసీ కో ఆర్డినేటర్ గుజ్జ సత్యం

హైదరాబాద్, నవంబర్ 19 (సత్య తెలంగాణ): పార్టీ రహితంగా జరిగే సర్పంచ్ ఎన్నికల్లో పార్టీ పరంగా రిజర్వేషన్లు ఎలా ఇస్తారో కాంగ్రెస్ పార్టీ ప్రభుత్వం సీఎం రేవంత్ రెడ్డి చెప్పాలని బీసీ జేఏసీ కో ఆర్డినేటర్, బీసీ సంక్షేమ సంఘం జాతీయ ఉపాధ్యక్షుడు గుజ్జ సత్యం డిమాండ్ చేశారు. పార్టీ పరంగా రిజర్వేషన్లు ఇస్తామని చెప్పడం బీసీలను మోసగించడమే అవుతుందని ఆయన ఆయన ఒక ప్రకటనలో పేర్కొన్నారు. కాంగ్రెస్ పార్టీ ప్రభుత్వం ఇచ్చిన హామీ మేరకు స్థానిక సంస్థల్లో 42 శాతం రిజర్వేషన్లు చట్టబద్దంగా ఇవ్వకుండా ఎన్నికలకు వెల్లడం బీసీలను అవమానించడమేనని ఆయన విమర్శించారు. సర్పంచి ఎన్నికలను జడ్పీటీసీ, ఎంపీటీసీలతో పాటు నిర్వహించాలని, లేదా మార్చి వరకు వేచి చూడాలని, అప్పటి వరకు రాష్ట్ర ప్రభుత్వం ఎన్నికల నిర్వహణపై తన నిర్ణయాన్ని ఉపసంహరించుకోవాలని డిమాండ్ చేశారు. ఈ దిశగా రాష్ట్ర ప్రభుత్వం పై ఒత్తిడి పెంచేందుకు బీసీ జేఏసీ చైర్మన్, రాజ్యసభ సభ్యులు ఆర్.కృష్ణయ్య నేతృత్వంలో ఈ నెల 21వ తేదీన రాష్ట్ర వ్యాప్తంగా తహసీల్దార్, ఆర్డీఓ, కలెక్టరేట్ కార్యాలయాల వద్ద నిరసన కార్యక్రమాలు చేపట్టనున్నట్లు ఆయన తెలిపారు.