బీసీల ఓటు బీసీలకే: పంచాయతీ ఎన్నికల్లో ఐక్యత ప్రదర్శించాలని గుజ్జ సత్యం పిలుపు

హైదరాబాద్, డిసెంబర్ 09, 2025 (సత్యతెలంగాణా): తెలంగాణలో జరుగుతున్న గ్రామ పంచాయతీ ఎన్నికల్లో బీసీలు ఐక్యమత్యంతో ముందుకు వచ్చి, జనరల్ స్థానాల్లో పోటీ చేస్తున్న బీసీ అభ్యర్థులను పార్టీలకు అతీతంగా గెలిపించాలని జాతీయ బీసీ సంక్షేమ సంఘం ఉపాధ్యక్షుడు, బీసీ జేఏసీ కో-ఆర్డినేటర్ గుజ్జ సత్యం పిలుపునిచ్చారు. రాజకీయ పార్టీలు బీసీలను మోసం చేసినందుకు బుద్ధి చెప్పాలంటే, బీసీలకు రాజకీయ అధికారం దక్కాలంటే ఈ ఎన్నికలు కీలకమని ఆయన అన్నారు.

రిజర్వేషన్లలో మోసం: జీవో 46తో 3,400 సీట్లు కోల్పోయాం

రాష్ట్ర ప్రభుత్వం జీవో నెంబర్ 9 ద్వారా బీసీలకు రాజకీయ రంగంలో రిజర్వేషన్లు అమలు చేసి ఉంటే, రాష్ట్రవ్యాప్తంగా 5,380 సర్పంచ్ స్థానాలు బీసీలకు దక్కేవని గుజ్జ సత్యం తెలిపారు. అయితే, జీవో నెంబర్ 46 ద్వారా బీసీ రిజర్వేషన్లను 17 శాతానికి తగ్గించి మోసం చేశారని ఆయన ఆరోపించారు. దీంతో బీసీలకు రావాల్సిన 3,400 రిజర్వు స్థానాలు జనరల్ స్థానాలుగా మార్చబడ్డాయని, ఇది బీసీల రాజకీయ అభివృద్ధికి పెద్ద దెబ్బ అని వివరించారు.

అగ్రకులాల కుట్రలు: డబ్బుతో ఓట్లు కొనుగోలు ప్రయత్నాలు

జనరల్ స్థానాలను అగ్రకులాలకు చెందినవిగా భ్రమలు కల్పించి, అక్రమంగా సమకూర్చిన ధనంతో బీసీల ఓట్లను కొనుగోలు చేసి బీసీ అభ్యర్థులను ఓడించాలని కొందరు కుట్రలు పన్నుతున్నారని గుజ్జ సత్యం హెచ్చరించారు. అత్యధిక జనాభా ఉన్నప్పటికీ, బీసీలు ఎంగిలి మెతుకుల కోసం ఆశపడి తమ వజ్రాయుధం లాంటి ఓటును అగ్రకులాలకు వేసి మోసపోవద్దని సూచించారు. “బీసీల ఓటు బీసీలకే” అనే నినాదంతో ముందుకు వచ్చి, “ఓటు మనదే, సీటు మనదే” అనే స్ఫూర్తితో వ్యవహరించాలని ఆయన కోరారు.

బహుజన ఐక్యత: ఎస్సీ, ఎస్టీ, మైనార్టీల సహకారం

గ్రామీణ ప్రాంతాల్లో 90 శాతం జనాభా బీసీ, ఎస్సీ, ఎస్టీలదేనని, 90 శాతం బహుజనులు కేవలం 9 శాతం అగ్రకులాలకు ఓటు వేయకూడదని గుజ్జ సత్యం స్పష్టం చేశారు. జనరల్ స్థానాల్లో నిలబడిన బీసీ అభ్యర్థులకు ఎస్సీ, ఎస్టీ, మైనార్టీలు కూడా అండగా నిలబడి సహకరించాలని విజ్ఞప్తి చేశారు. అంతిమంగా, తెలంగాణలో పల్లె నుంచి పట్టణం వరకు బహుజన రాజ్యాధికారానికి మార్గం సుగమం చేయాలని ఆయన పిలుపునిచ్చారు. ఈ ఎన్నికలు బీసీల రాజకీయ చైతన్యాన్ని చాటిచెప్పే అవకాశమని ఆయన అభిప్రాయపడ్డారు.